【狂迷手記】Carol

作者：Carol

其實當初加入球迷會無乜特別原因，只係諗住身為曼聯fans希望都支持下香港官方球迷會，基本上都無諗過球迷會有咩福利有咩活動，直至……奧脫福朝聖：原定買三場比賽門票，但中間一場因官網顯示門票賣晒，嗰一刻先令我嘗試搵球迷會幫手。

由於球迷會有預留門票，於是好快就幫忙買到門票，後來我先發現經球迷會買門票，仲可以免除3%手續費。雖然球迷會仲有睇波同踢波活動，由於踢波我無興趣，睇波我亦有自己嘅習慣，所以朝聖過後又回到～無諗球迷會有咩福利有咩活動嘅心態。再直至……前曼聯球員來港，球迷會竟然可以安排會員參與聚會，令我當堂叮左一聲，要知道唔係個個球迷都會親身到英國，但透過球迷會都可以同球員近距離接觸、簽名同合照（最勁嘅係仲唔使同人迫）。其實到目前為止，我都因為工作時間關係未有機會參與球員見面會，但相信終有一日可以夾啱時間參加，哈哈！

［右圖：Carol朝聖時得到的戰利品］

其次就係一些團購同購物優惠，參加這些就當然為慳錢啦，我相信無人會為左慳少少錢而加入球迷會，個人認為如果已經係會員，買嘢又可以慳返少少，何樂而不為？

到最後，請容許我介紹一下自己：我在香港曼聯官方球迷會中只係一個無出席過活動的低調會員，去朝聖只係為左係傑斯退休前親身睇佢一次比賽（我亦非常慶幸自己那個時間的朝聖決定，如果上季無去可能要抱憾終生），如果用我嚟同一個普通球迷相比，我應該係普通球迷中最普通最唔發聲嗰個。雖然球迷會活動我無參加過，但我亦會繼續做這個低調會員，原因好簡單：就係唔想失去參加將來一個令我再叮一聲嘅活動機會，哈哈！！